అమెరికాలో నిలిచిన వందలాది విమానాలు.. సాంకేతిక సమస్యే కారణం

అమెరికాలోని పలు ఎయిర్ పోర్టులలో విమానాల రాకపోకలకు తీవ్ర అంతరాయం కలిగింది. వందలాది విమానాలు రద్దయ్యాయి. పలు విమానాలు తీవ్ర ఆలస్యంగా నడుస్తున్నాయి. ఫలితంగా డాలస్ సహా పలు విమానాశ్రయాలలో ప్రయాణికులు నిరీక్షిస్తున్నారు. టెలికాం సర్వీసుల్లో అంతరాయం కారణంగా విమానాల రాకపోకలపై తీవ్ర ప్రభావం పడిందని అమెరికా ఏవియేషన్ అధికారులు తెలిపారు.

దేశవ్యాప్తంగా మొత్తం 1800 విమానాలపై ఈ ప్రభావం పడిందని, డాలస్ లోనే 200 విమాన సర్వీసులు పూర్తిగా రద్దు కాగా, 500లకు పైగా సర్వీసులు ఆలస్యంగా నడుస్తున్నాయని అధికారులు పేర్కొన్నారు. టెలికాం సేవల్లో ఏర్పడిన సమస్యను గుర్తించి పరిష్కరించేందుకు కృషి చేస్తున్నామని వారు వెల్లడించారు. ఈ ఏడాది ఫెడరల్ ఏవియేషన్ అడ్మినిస్ట్రేషన్ (ఎఫ్‌ఏఏ) తన కమ్యూనికేషన్‌ సర్వీసుల్లో అనేక సమస్యలు ఎదుర్కొంది. గురువారం కూడా డెన్వర్‌ అంతర్జాతీయ విమానాశ్రయంలో విమానాల రాకపోకలపై తీవ్ర ప్రభావం పడింది.